सांसद बन्न अर्बपति देखि सञ्चार उद्यमी सम्मले दिए उम्मेद्वारी

प्रतिनिधिसभा निर्वाचनमा व्यवसायीहरूको बाक्लो सहभागिता

काठमाडौँ । फागुन २१ को प्रतिनिधिसभा तर्फको निर्वाचनका लागि यसपटक प्रत्यक्षतर्फ उद्योगी व्यवसायीहरुले बाक्लो सङ्ख्यामा उम्मेद्वारी दर्ता गराएका छन् । उम्मेद्वारी दर्ता गराउनेमा शेयरकारोबारी, सहकारी सञ्चालक देखि ठुला उद्योगी व्यवसायी सम्म रहेका छन् ।

करिब दुई दर्जन उद्योगी व्यवसायी चुनावी मैदानमा

आगामि निर्वाचनका लागि करीब दुई दर्जनभन्दा बढी उद्योगी व्यवसायीले उम्मेद्वारी दर्ता गराएका छन् । तिनै मध्येका एकहुन नेपालकै पहिलो अर्बपति बिनोद चौधरी, उनले नेपाली कांग्रेसबाट नवलपरासी पश्चीम क्षेत्र नं –१ बाट मंगलबार आफ्नो उम्मेद्वारी दर्ता गराएका हुन् । चौधरीको यो दोस्रो चुनावी प्रतिस्पर्धा हो ।

नीति निर्माण तहमा पुग्ने चाहना

राजनीतिमा व्यवसायीको आकर्षण बढ्नुको मुख्य कारण नीति निर्माण तहमा पुग्ने चाहना रहेको उनीहरू बताउँछन् । उद्योगमैत्री कानुन, कर प्रणालीमा सुधार, लगानी सुरक्षाजस्ता मुद्दालाई संसदमा बलियो ढंगले उठाउन आफूहरू आवश्यक रहेको उनीहरूको तर्क छ । नीति बनाउने ठाउँमै नपुगेसम्म उद्योग–व्यवसायका समस्या समाधान नहुने उनिहरुको तर्क छ । करेन्ट चाउचाउ उत्पादन गर्ने यशोदा फुड्सका अध्यक्ष चुन्नप्रसाद शर्मा पौडेलले पनि रुपन्देही–२ बाट कांग्रेसको तर्फबाट उम्मेदवारी दिएका छन् । यो उनको पहिलो चुनावी प्रतिस्पर्धा हो ।

स्वतन्त्र तथा दलगत उम्मेद्वारी दिएका उद्यमीहरू

पठाओका प्रबन्ध निर्देशक असीममान सिंह बस्न्यातले काठमाडौँ–१ बाट स्वतन्त्र रूपमै उम्मेद्वारी दिएका छन् । उनले यसअघि नै आफुले स्वतन्त्र रुपमा निवार्चनमा भाग लिने जानकारी गराएका थिए । यस्तै, नेपाली कांग्रसका तर्फबाट पर्सा–४ मा टिकट पाएका अनिलकुमार रुंगटा पनि स्थापित उद्योगी हुन् । कास्की–१ बाट नुर ओभर्सिज म्यानपावरका सञ्चालक तिलक रानाभाट नेपाली कांग्रेसबाट चुनावी मैदानमा उत्रिएका छन् ।

मुक्तिनाथ विकास बैंकका पूर्व प्रमुख कार्यकारी अधिकृत (सीईओ) तथा सञ्चालक समितिका पूर्व अध्यक्ष भरतराज ढकालले स्याङ्जा–१ बाट कांग्रेसको तर्फबाट उम्मेद्वारी दिएका छन् ।

मेडिकल, बैंकिङ र जलविद्युत् क्षेत्रमा लगानी गरेका उम्मेद्वार

व्यवसायी पृष्ठभूमिबाट प्रतिनिधिसभा चुनाव लड्न लागेका अर्का व्यक्ति हुन् । मेडिकल व्यवसायी सुनीलकुमार शर्मा । कांग्रेसले मोरङ–३ मा उम्मेदवार बनाएका काठमाडौं मेडिकल कलेज र नोबल मेडिकल कलेजका सञ्चालक शर्माले जलविद्युत् आयोजनामा पनि लगानी गर्न लागेका छन् । उनी यसअघिको निर्वाचनमा मोरङ–३ बाटै निर्वाचित भएका थिए ।

सञ्चार उद्यमी र बहुक्षेत्रीय लगानीकर्ता पनि मैदानमा

सञ्चार उद्यमीका रूपमा चिनिने ऋषिराज धमला रौतहट–१ बाट चुनावी मैदानमा उत्रिएका छन् । प्रभु शाहको पार्टी आम जनता पार्टीले उनलाई उम्मेदवार बनाएको छ । राष्ट्रिय स्वतन्त्र पार्टीका उपाध्यक्षसमेत रहेका डीपी अर्याल काठमाडौँ–९ बाट उम्मेदवार बनेका छन् । उनको कृषि फार्म, ट्राभल सर्भिस, सहकारी, इँटा उद्योग, रेमिटेन्स कम्पनी, एजुकेशन कन्सल्टेन्सी, सेक्युरिटी सर्भिस, ट्रेकिङ सर्भिस, होटेलसहितमा लगानी छ । उनी अघिल्लो निर्वाचनमा समानुपातिकतर्फबाट सांसद बनेका थिए ।

युवा शेयर कारोबारीदेखि अन्य व्यवसायी उम्मेद्वार

युवा शेयर कारोबारी हरि ढकालले पनि चितवन–१ बाट दोस्रो पटक उम्मेद्वारी दर्ता गराएका छन् । राष्ट्रिय स्वतन्त्र पार्टी (रास्वपा) का नेता ढकाल यसअघि सोही क्षेत्रबाट निर्वाचित भएका थिए । कांग्रेसका तर्फबाट रसुवामा उम्मेदवार बनेका मोहन आचार्य, धादिङ–२ बाट टिकट पाएका रमेशप्रसाद धमला, एमालेबाट कपिलवस्तु–३ मा उम्मेद्वारी दिएका वीरेन्द्रप्रसाद कनौडिया तथा झापा–४ बाट उम्मेदवार बनेका एलपी साँवा लिम्बू पनि विभिन्न व्यवसाय तथा उद्यमसँग सम्बन्धित व्यक्तिहरू हुन् ।