पार्टी विधान विपरीत गतिविधिमा संलग्न भएको ठहर

काठमाडौं । नेपाली कम्युनिस्ट पार्टी (नेकपा) ले पार्टी विधान विपरीत गतिविधिमा संलग्न भएको आरोपमा ७ जना नेता तथा कार्यकर्तालाई पार्टीबाट निष्कासन गरेको छ। पार्टी केन्द्रीय कार्यालयबाट जारी विज्ञप्ति अनुसार आगामी फागुन २१ गते हुने आम निर्वाचनसँग सम्बन्धित विषयमा पार्टीको निर्णय र निर्देशन विपरीत काम गरेको ठहर गर्दै उनीहरूमाथि कारबाही गरिएको हो।

आधिकारिक उम्मेदवारविरुद्ध गतिविधि गरेको आरोप

विज्ञप्तिमा उल्लेख भएअनुसार आधिकारिक उम्मेदवार रहेका निर्वाचन क्षेत्रमा पार्टीले तोकेका उम्मेदवारविरुद्ध गतिविधि गरेको, स्वतन्त्र वा अन्य उम्मेदवारलाई समर्थन तथा प्रचार–प्रसारमा संलग्न भएको पुष्टि भएपछि पार्टी विधानको दफा ७६ बमोजिम अनुशासनात्मक कारबाही गरिएको जनाइएको छ।

सिन्धुली, उदयपुर र सिरहाका नेता–कार्यकर्ता कारबाहीमा

कारबाहीमा पर्नेमा सिन्धुली, उदयपुर र सिरहाका विभिन्न नेता तथा कार्यकर्ता रहेका छन्। पार्टीले यस्ता गतिविधिले संगठनात्मक एकता, अनुशासन र चुनावी रणनीतिमा गम्भीर असर पार्ने भन्दै भविष्यमा यस्ता कार्य दोहोरिन नदिने चेतावनी समेत दिएको छ।

निर्वाचनको संवेदनशील घडीमा पार्टीको कडा चेतावनी

नेकपाले निर्वाचनको संवेदनशील घडीमा पार्टी हितविपरीत हुने कुनै पनि गतिविधि सह्य नहुने स्पष्ट पार्दै सम्पूर्ण नेता–कार्यकर्तालाई आधिकारिक निर्णयअनुसार एकताबद्ध भएर अघि बढ्न आग्रह गरेको छ।

प्रचण्ड र माधव नेपालद्वारा हस्ताक्षरित विज्ञप्ति

विज्ञप्तिमा सह–संयोजक माधवकुमार नेपाल र संयोजक पुष्पकमल दाहाल ‘प्रचण्ड’को हस्ताक्षर रहेको छ।